Սերժ Սարգսյանը Կարեն Կարապետյանի «կարանտինը» հայտարարեց ավարտված

Սերժ Սարգսյանը նախօրեին Ջերմուկում խորհրդակցություն է անցկացրել զբոսաշրջության զարգացման թեմայով և այդ խորհրդակցությանը տվել մի շարք հանձնարարականներ: Խորհրդակցությունն ինքնին կարելի կլիներ դասել Սերժ Սարգսյանի մասնակցությամբ այդօրինակ միջոցառումների շարքին, համարելով հերթականը, որից հերթական անգամ ոչ մի սկզբունքային բան չի փոխվելու կյանքում, եթե չլիներ մի հետաքրքրական հանգամանք: Իհարկե, այդ հանգամանքը կապված չէ հանրային կյանքի սկզբունքային փոփոխության որևէ նախադրյալի հետ:

Պարզապես այդ խորհրդակցության ընթացքում Սերժ Սարգսյանը, ի թիվս տարբեր հանձնարարականների, հանձնարարություն է տվել նաև վարչապետ Կարեն Կարապետյանին: Ընդ որում, հանձնարարության բովանդակությունն ինքնին այդքան էլ կարևոր չէ, կարևոր է հանձնարարության փաստը՝ հատկապես այն իրողության ֆոնին, որ վարչապետ նշանակվելուց հետո հանձնարարականներ սովորաբար հնչեցնում էր Կարեն Կարապետյանը: Իհարկե, դրանք ուղղված չէին Սերժ Սարգսյանին, բայց երևի հենց դրանց միջոցով էր նաև, որ Կարեն Կարապետյանի վարկանիշը սոցհարցման արդյունքում ավելի բարձր է եղել, քան Սերժ Սարգսյանինը: Եվ ահա Սերժ Սարգսյանը երևի թե որոշել է ցույց տալ, թե «ով է այստեղ հանձնարարական տալիս»:

Այդ տեսանկյունից Կարեն Կարապետյանի նշանակման երկամսյա, այսպես ասած, «կարանտինից» հետո Սերժ Սարգսյանը փաստորեն անցնում է գործի և ցույց տալիս, որ Կարեն Կարապետյանը չէ դրության տերը, այլ ինքը՝ Սերժ Սարգսյանը: Սրանով Սարգսյանն անշուշտ իր վարկանիշի խնդիրը չէ, որ փորձում է հոգալ, կամ ավելի շուտ հանրային շրջանում չէ, որ փորձում է վերականգնել իր վարկանիշը, այլ իշխանական համակարգում: Սերժ Սարգսյանն ըստ երևույթին անցել է ակտիվ գործողությունների, որոնց նպատակն է ցույց տալ, որ փոփոխությունները չեն շոշափում բուրգի գագաթը և վերաբերելու են միայն դրանից ցածր գտնվող հատվածներին:

Դժվար է ասել՝ Սերժ Սարգսյանը պարզապես փորձում է նախընտրական իրավիճակը լիովին չհանձնե՞լ Կարեն Կարապետյանին՝ մտավախություն ունենալով, որ նա չի կարող ամբողջապես կառավարել այդ իրավիճակը և կտապալվի՝ առաջացնելով լուրջ խնդիրներ, թե՞ Սարգսյանը պարզապես համարում է Կարեն Կարապետյանի քարոզչական նախագիծը սպառված, և քանի դեռ չի սկսվել դրա իրական քաղաքական մասը, և Կարապետյանը չի դարձել քաղաքական «հասուն» գործոն, Սարգսյանը փորձում է կանխել այդ «հասունացումը» իր համար անհրաժեշտ մակարդակում, որպեսզի այն իր քաղաքական ծրագրերի միջոցից չվերածվի դրանց լուրջ խոչընդոտի:

Today's most read news !
  • «Եվրատեսիլ»-ում Հայաստանի ներկայացուցիչը 2-րդ տեղում է լավագույն կին կատարողների մրցույթում
  • «Եղնիկների կածանը». ուշագրավ փաստեր Ապրիլյան պատերազմին առնչվող ֆիլմի նկարահանման հրապարակից
  • Պատժամիջոցների ենթակա պաշտոնյաներն ու ֆունկցիոներները
  • Ամենապրոֆեսիոնալ երգչին անգամ կարող են կոտրել բացասական մեկնաբանությունները. Ինգա Արշակյանը՝ «Եվրատեսիլ-2017»-ի երգի մասին
  • Միշտ չէ, որ առաջին փորձը իդեալական է լինում. «Armenian Europe Music Awards Paris 2017» մրցանակաբաշխության կազմակերպիչը` թերությունների մասին
  • Քիմ Քարդաշյանը ելույթ կունենա կանանց գագաթնաժողովում
  • Միլիարդակռիվ. Ի՞նչ դեր է ունենալու Մոսկվան այդ կռվում
  • Գնալը միշտ էլ կա. Արտյոմ Հակոբյանը՝ Հայաստանը չլքելու ու նոր ՝«3/Off» նախագիծի մասին
Comments

Name: