Բոլորիս կյանքում էլ լինում են դժվար դրվագներ. Սյուզի Մելիքյան

Երգչուհի եւ դիմահարդար Սյուզի Մելիքյանը վերջին՝ «Ինձ գրկիր» տեսահոլովակից հետո ստեծագործական հանգստի մեջ է՝ իր խոսքով, որպեսզի հավաքի անհրաժեշտ էներգիան նոր աշխատանքի համար:

«Երգ ստեղծելն ինձ համար այնքան էլ հեշտ պրոցես չէ, ես պետք է հոգեպես պատրաստ լինեմ, որպեսզի կարողանամ կյանք տալ որեւէ երգի, քանի որ ամեն երգի մեջ ես ունեմ պատմություն, իմաստ, էմոցիաներ: Այնպես չէ, որ ես կարող եմ մի երգ գնել ու անմիջապես կատարել այն. առհասարակ ինձ համար ինքնանպատակ էլ չէ իրար հետեւից նոր աշխատանք ներկայացնելը»,- Life.panorama.am-ի հետ զրույցում պատմեց Սյուզին ու անդրադարձավ վերջին երգի հետ կապված արձագանքներին.

«Բավական ժամանակ էր անցել մինչ վերջին տեսահոլովակս, ու այն ինձ համար էլ էր շատ սպասված: Պետք է նշեմ, որ ինձ շատ են ոգեւորել արձագանքները, քանի որ իսկապես շատերը խոստովանեցին, որ «Ինձ գրկիր» երգը շատ զգացմունքային էր, գրեթե չկար մեկն, ով լսեր երգն ու չհուզվեր: Ուրախ եմ, որ կարողացել եմ տեղ հասցնել էմոցիաներս, ես լիարժեք բավարարված եմ երկրպագուներիս արձագանքից»:

Վերհիշելով այն խոսակցությունները, ըստ որի «Ինձ գրկիր» երգում Սյուզի Մելիքյանը պատմել է սեփական սիրո պատմության ու զգացմունքների մասին, երգչուհին նկատեց.

«Կարծում եմ՝ բոլորիս կյանքում էլ լինում են դժվար դրվագներ, մենք կարող ենք ապրել պահեր, որի մասին ոչ մեկ չիմանա, քանի որ մեր շրջապատում կարող ենք միշտ ժպտալ ու չխոսել սեփական խնդիրների մասին: Երգիչներն իրենց ապրումները կուտակելով՝ երբեմն դուրս են բերում երգի միջոցով: Ինչ վերաբերվում է այս երգի բառերը ամբողջովին ինձ վերաբերվելուն, դա իհարկե, սխալ է, բայց ինչ խոսք, երգում կան տողեր, որոնք իմ կյանքի հետ էլ կապ ունեն, կան տողեր էլ, որոնք ինձ հետ որեւէ առնչություն չունեն, բայց կարող են պատմել մեկ ուրիշի կյանքի մասին: Մի գաղտնիք էլ բացեմ՝ անկախ նրանից, թե երգում ինչ տողեր կան, ես կատարածս յուրաքանչյուր երգ վերապրում եմ»:

Այս պահին Սյուզի Մելիքյանն արդեն նոր աշխատանքներ ունի, որոնք կներկայացնի ժամանակ անց, իսկ մինչ այդ նա կենտրոնացել է դիմահարդարման աշխատանքի վրա.

«Դիմահարդարման արվեստը շարունակում է ինձ համար մնալ երկրորդ, բայց ոչ պակաս կարեւոր մասնագիտություն: Այս ոլորտում ես անընդհատ կատարելագործում եմ ինքս ինձ, մասնակցում եմ տարբեր մաստեր-կլասերի, վերապատրաստական դասընթացների: Հիմա ունեմ մեծ թվով աշակերտներ, շուտով ավելի մեծ ու հարմարավետ սրահ կտեղափոխվեմ, որպեսզի աշակերտներս էլ իրենց ազատ ու հանգիստ զգան»,- պատմեց Սյուզի Մելիքյանը՝ հավելելով, որ դեռեւս իր երազանքներում է մնում սեփական սրահ ունենալը, սակայն այս հարցում նա ունի իր հստակ մոտեցումը.

«Իմ կյանքում մի կարգախոս ունեմ՝ հասնել երազանքներիս դանդաղ ու կշռադատված քայլերով, առանց շտապելու: Ես չեմ սիրում շտապել, նախընտրում եմ մտածված քայլել»,- թեման ավարտեց երգչուհի դիմահարդարը:

Անդրադառնալով անձնական կյանքին՝ Սյուզի Մելիքյանը նկատեց, որ միշտ սրտնեղել է, երբ լսել է իր՝ այդ դաշտի վերաբերյալ քննարկումները.

«Անկախ նրանից լավ, թե վատ միտումով՝ անձնական կյանքիս մասին քննարկումները ինձ միշտ նյարդայնացրել են: Յուրաքանչյուր մարդ քննարկելով ուրիշի կյանքը՝ թող մի պահ իրեն տվյալ մարդու փոխարեն պատկերացնի: Սա իմ կյանքն է եւ ես չեմ ուզում, որ իմ կյանքը բաց լինի: Իհարկե,  հիմա էլ չեմ խոսի անձնական կյանքիս մասին, պարզապես կասեմ, որ իմ կյանքում ամեն ինչ նորմալ է, ու չեմ ուզում մեկնաբանել իմ հասցեին հնչած ոչ դրական եւ ոչ էլ բացասական խոսակցությունները»,- հավելեց նա:

Today's most read news !
  • Եղբորս մահը երբեք չեմ օգտագործել ինձ PR անելու համար. Գուրգեն Դաբաղյան
  • Իմ և ամուսնուս խոսակցություններն երբեմն այնքան բուռն են լինում, որ ասում եմ` վերջ. Զառա Սահակյան
  • Ռոբսոն, Դոն Պիպո․Ռուսաստանի հանցագործ աշխարհի հայ ներկայացուցիչներն աջակցում են Կարեն Կարապետյանին
  • Գագիկ Ծառուկյանի պատասխանը Սամվել Կարապետյանին
  • «Չեյնջ 2»-ը «Արմենիա Պրեմիում»-ի եթերում կցուցադրվի ապրիլի 4-ից
  • Շառլ Ազնավուրը բացահայտել է իր բնավորության գլխավոր հայկական գիծը
  • Վաչե Թովմասյանը` իր և Կարեն Բաբաջյանյանի միջև եղած խնդիրների և չշփվելու մասին
  • Քիմ Քարդաշյանը ցանկանում է ևս մեկ երեխա ունենալ
Comments

Name: