«Արվեստի տված հուզմունքը մարդուն ազնվացնում, որակական փոփոխությունների է ենթարկում». Հայկ Պետրոսյան


Նախօրեին կայացավ  կինոռեժիսոր Մհեր Մկրտչյանի «Կյանք ու կռիվ» ֆիլմի պրեմիերան, որը նվիրված է Արցախի հերոսներին և Անկախության 25-ամյակին: Ֆիլմի գլխավոր հերոսներից մեկին մարմնավորել է  դերասան Վարդան Պետրոսյանի որդին՝ երգիչ, դերասան Հայկ Պետրոսյանը:
 
Life.panorama.am-ի հետ զրույցում Հայկը պատմեց, որ նշեց, որ «Կյանք ու կռիվ» ֆիլմն իր համար առաջին քայլերն է կինոյի ասպարեզում: «Ես նորեկ եմ կինոասպարեզում ու սա ընդամենը 2-րդ ֆիլմն էր, որտեղ իմ մասնակցությունն ունեցա: Այս առումով պետք է շեշտեմ, որ ինձ համար մեծ երջանկություն էր հենց առաջին քայլերն անել նման պրոֆեսիոնալ անձնակազմի հետ, այստեղ բոլորն իրենց գործի գիտակներն էին, ընդ որում բոլորն ասելով նկատի ունեմ ռեժիսորից մինչև ադմինիստրատոր, հենց համատեղ պրոֆեսիոնալ աշխատանքի շնորհիվ է, որ էկրաններ բարձրանալու առաջին իսկ օրից մարդիկ խոսում են ֆիլմի բարձր որակի մասին, ինչպիսին, կարծես թե, դեռ չի եղել հայկական կինոարտադրության մեջ»- նշեց Հայկ Պետրոսյանը:
 

 
Թեև նկարահանման ժամանակ Հայկը կոտրել է քիթը, սակայն նաև հումորով է վերհիշում այդ դրվագը. «Նկարահանման ընթացքում ծեծկռտուքի կադրեր կան, որն իրականացնելիս որպես Կոմիտասում մեծացած ու կռիվների միջով անցած տղա՝ սրտիս շատ էի մոտ ընդունել, որի արդյունքում կոտրեցի քիթս ու որոշ վնասվածքներ ստացա, իհարկե Փառք Աստծո, լուրջ վնասվածքներ չեղան: Ֆիլմի նկարահանումները շատ ուրախ, հուզիչ ու հետաքրքիր անցան, անգամ տեսարաններ կային, երբ նկարահանման ժամանակ ամբողջ անձնակազմը հուզվում էր. գիտեմ, որ ֆիլմը դիտելիս ևս այդ հուզմունքը փոխանցվում է հանդիսատեսին, ինչը շատ կարևոր է արվեստում, ի դեպ՝ հուզվել ասելով նկատի չունեմ արտասվելը, արվեստի տված հուզմունքը մարդուն ազնվացնում, որակական փոփոխությունների է ենթարկում»:
 
Անդրադառնալով իր կերպարին՝ Լևոնին, ով չորս ընկերներից մեկն է ֆիլմում, և որին բախտ է վիճակվում ամուսնանալ սիրած աղջկա հետ, Հայկ Պետրոսյանը պատմեց. «Ինչպես արդեն հայտնի է՝ ֆիլմի գլխավոր հերոսները չորս ընկերներն են, որոնցից երեքը սիրահարված են երրորդ ընկերոջ քրոջը, ու միայն իմ կերպարին՝ Լևոնին, հաջողվեց ամուսնանալ այդ աղջկա հետ: Սակայն, թե որքանո՞վ երջանիկ դարձավ Լևոնը՝ ամուսնանալով աղջկա հետ, ով սիրում է իր ընկերոջը, արդեն հարցի մյուս կողմն է, որի պատասխանը տրվում է ֆիլմի երկրորդ մասում: Լևոնը դրական կերպար է, նա բազմաֆունկցիոնալ տղա է, օրինակ, եթե իր ընկերներից ամեն մեկն ունեն գլխավոր մի գիծ իրենց բնավորության մեջ, ապա նրա մեջ մի քանի այդպիսի գծեր կան»:
 

 
Դերասանի խոսքով՝ իր համար ֆիլմը առանձնահատուկ նշանակություն ունի. «Առաջին բանը, որ ֆիլմում կարևորվում է, անկախությունն է ու թե ինչ գնով է ձեռք բերվել այդ անկախությունը, որը դարձավ 25 տարեկան: Այսօրվա Հայաստանում շատերի կարծիքով մենք  արժանի ժառանգորդներ չենք այն մարդկանց համար, ովքեր իրենց կյանքն ու զավակներին տվեցին այդ անկախության դիմաց, բայց ֆիլմը ցույց է տալիս, որ դա այնքան էլ այդպես չէ: Ֆիլմում շատ կարևոր դաստիարակչական դրվագներ կան հատկապես երիտասարդ սերնդի համար, կան կերպարներ, ովքեր իրենց տեսակով արդեն սովորեցնող են, ի դեպ՝ ծառայության տարիներին ինքս բախտ եմ ունեցել իրական կյանքում շփվել Արցախյան ազատամարտին մասնակցած հրամանատարների հետ, ովքեր կենդանի հերոսներ են»,- նշեց Հայկը:
 
Անդրադառնալով վերջին օրերին իր  թողարկած «Պոմիդորով ձվածեղ» կոչվող կատակ–երգի տեսահոլովակին՝ Հայկը նշեց. «Այսօր շատ են ռոմանտիկ երգերն ու ես որոշեցի, որ սկզբնական շրջանում հանդես գամ նման կատակ-երգերով: «Պոմիդորով ձվածեղ»-ը երկար ժամանակ է, ինչ երգում եմ, շատերն էին այն սիրում ու որոշեցի ձայնագրել և տեսահոլովակով ներկայացնել: Ինքս կատակասեր, ռոմանտիկ տղա եմ, այնպես որ սկզբում կատակն առաջ կտանք, հետո նոր քայլ առ քայլ կանցնենք ռոմանտիզմին»:
 

 
Հարցին, թե ո՞ւմ միտքն էր տեսահոլովակը նկարահանել մեկ դուբլով և արդյոք դա դժվար չէ՞ր իրականացնել, երգիչ-դերասանը նկատեց. «Մեկ դուբլով տեսահոլովակ նկարահանելն իմ միտքն էր, որն իրականացրի ռեժիսոր Մարիամ Գևորգյանի հետ, բայց սա չենք արել տարբերվելու համար: Ես պարզապես ուզում էի, որ նման չլինի ստանդարտ տեսահոլովակներին, փոխարենը լինի սկետչի նման ու այդպիսով էլ ավելի հետաքրքրի դիտողներին: Առաջին հայացքից թվում է, թե շատ հեշտ է նման տեսահոլովակ նկարահանելը, բայց իրականում այն շատ բարդ էր, քանի որ մեկ կիքսի պատճառով ստիպված պետք է ամբողջը կրկին նկարահանես: Ինչևէ, 20 անգամ տանջվելուց հետո ստացվեց այս տեսահոլովակը, որն ի ուրախություն ինձ, արդեն դրական արձագանքներ ունի»:
Today's most read news !
  • Որ փոփոխությունը չլինեն միայն ազգանունները
  • Ինչպես չսպանվել սահմանին
  • Իրան՝ ճակատ, որը մնում է հետին պլանում. Milliyet, Թուրքիա
  • Ընդառաջ գնալը անհրաժեշտություն է
  • Սպասել երրորդի՞ն… երկրորդ պատերազմն ընդհատվե՞լ է
Comments
Loading...